Sábháil an dáta do Chomhdháil Pleanála Teanga 2026
Bígí linn don dara chomhdháil idirnáisiúnta ar an phleanáil teanga in Éirinn, a bheidh ar siúl Déardaoin 12 Samhain 2026 i Treacy’s West County Hotel, Inis, Contae an Chláir.
In 2024 eagraíodh an chéad chomhdháil idirnáisiúnta faoin phleanáil teanga in Éirinn. Rinneadh plé ar réimse leathan ábhar bainteach leis an phróiseas pleanála teanga i bpobail fud fad na tíre agus roinneadh saineolas idirnáisiúnta ar shamplaí pleanála i dtíortha eile.
I mbliana, tiocfaidh cleachtóirí, taighdeoirí, feidhmeannaigh beartas agus go leor eile ó phobal na Gaeilge go ginearálta le chéile in Inis, Contae an Chláir, don dara chomhdháil idirnáisiúnta pleanála teanga.
Is é téama na comhdhála seo ná ‘Sealbhú na Gaeilge agus an Próiseas Pleanála Teanga.’ Déanfar fiosrú agus plé ar na bealaí éagsúla gur féidir leis an phróiseas pleanála teanga in Éirinn tacú le sealbhú na Gaeilge i ngach aoisghrúpa, agus do gach leibhéal cumais sa teanga, lasmuigh den chóras oideachais.
Déanfar fógra maidir le clár an lae agus osclófar clárúchán go luath. Idir an dá linn, is féidir amharc siar nó éisteacht siar le cuid de na cainteanna ó Chomhdháil 2024 anseo.
Tá Comhdháil Pleanála Teanga á heagrú ag Foras na Gaeilge le tacaíocht ó Roinn Forbartha Pobal agus Tuaithe agus Gaeltachta.
