Cruinniú d'Fhóram Pleanála Teanga na nÚdarás Áitiúil

Ar an 19 Meitheamh eagraíodh cruinniú d’Fhóram Pleanála Teanga na nÚdarás Áitiúil. Ar an fhóram seo suíonn na Príomhoifigigh ó na húdaráis áitiúla ina bhfuil próiseas pleanála teanga ar siúl iontu (.i. ceantar ina bhfuil Líonra Gaeilge, Baile Seirbhíse Gaeltachta nó Limistéar Pleanála Teanga Gaeltachta). Déanann Foras na Gaeile agus Údarás na Gaeltachta comh-chathaoirleacht ar an fhóram seo, a thugann deis do na húdaráis áitiúla plé a dhéanamh ar cheisteanna comónta a bhaineann leis an phleanáil teanga agus faoi dheiseanna comhoibrithe atá ann chun tacú leis an phróiseas.

Le linn an chruinniú, labhair Brian Ó Gaibhín, Bainisteoir Áras Chrónáin, ar an tábhacht a bhaineann le lárionaid Ghaeilge agus na deiseanna a chruthaíonn siad do phobail Ghaeilge.

Chomh maith leis sin, labhair an tAire Forbartha Tuaithe agus Pobail agus Gaeltachta Dara Calleary leis an fhóram agus rinneadh plé ar réimse leathan ceisteanna a bhaineann leis an Ghaeilge, le ceisteanna tithíochta, leis na phleanáil teanga agus le soláthar seirbhíse trí mheán na Gaeilge sna húdaráis áitiúla.